Du leitar etter kvinna sine spor gjennom tidene.
Leit i vatnet.
Leit i alle tårer som har rent frå tålige auge,
frå fortvila auge, frå oppgitte og trassige auge,
ja, frå hatefulle så vel som elskande auge.
Leit i alt vatnet
som har rent gjennom hendane hennar
når klæde vart tvetta i vaskestampane,
sulka på ny
og tvetta i stampane om att og om att.
Leit i alle reinvassbyttene ho bar i åket.
Leit etter spora i alle oppvaskbaljene,
i alle golvvaskbøttene.
Leit i vatnet ved alle skylesteinane
ved elvar og grøver.
Ja, leit i vatnet
som har rent gjennom hendane hennar
- kanskje finn du ditt eige andlet.
-Kari Bakke
Ingen kommentarer:
Legg inn en kommentar